ស្វែងយល់ពី របៀបរាប់ថ្ងៃខែ ដើម្បីមានផ្ទៃពោះ និងវិធីសាស្រ្ត ក្នុងការកំណត់ភេទ របស់ទារកក្នុងផ្ទៃ!

សម្រាប់គូស្វាមីភរិយា គ្រប់ៗគ្នា ការមានបុត្រធីតា គឺជាបទពិសោធន៍ជីវិត ដ៏អស្ចារ្យមិនអាចបំភ្លេចបាន និងជាការស្វាគមន៍ សមាជិកគ្រួសារថ្មីម្នាក់ទៀតផងដែរ។ ការមានផ្ទៃពោះដោយចៃដន្យ អាចជាដំណឹងភ្ញាក់ផ្អើលដ៏រីករាយ ប៉ុន្តែសម្រាប់គូស្វាមីភរិយាមួយចំនួនផ្សេងទៀត បែរជាដំណឹង ដែលអាចបង្កជាបញ្ហាទៅវិញ។ ជួនកាល នៅពេលដែលចង់បាន បែរជាគ្មានក៏មាន។

ហេតុនេះហើយ ថ្ងៃនេះយើងនឹងបង្ហាញពីរបៀបគិតថ្ងៃខែ សម្រាប់យកបុត្រធីតា ទៅតាមពេលវេលា ដែលអ្នកចង់បាន។ ជាពិសេស អត្ថបទនេះនឹងបន្ថែមនូវវិធីសាស្រ្តមួយចំនួន ដើម្បីកំណត់ភេទទារក តាមដែលអ្នកចង់បានផងដែរ។ កុំបង្អង់យូរ តោះទៅតាមដានទាំងអស់គ្នា! 

# ពេលណាទើបជាពេលរួមភេទល្អបំផុត ដើម្បីមានផ្ទៃពោះ?

ពេលវេលា ដែលមានប្រសិទ្ធភាពបំផុត ក្នុងការមានផ្ទៃពោះរបស់ស្រ្តី គឺមានរយៈពេល ៦ ថ្ងៃ ជារៀងរាល់ខែ។ នៅក្នុងរយៈពេល ៦ ថ្ងៃនោះ មាន ៥ ថ្ងៃជា ថ្ងៃដែលនឹងត្រូវបញ្ចេញអូវុល និង ១ថ្ងៃទៀត ជាថ្ងៃបញ្ចេញអូវុល (ឬស៊ុតបង្កកំណើត)។

ស៊ុតបង្កកំណើតរបស់ស្រ្តី មានអាយុត្រឹមតែមួយថ្ងៃ ពេលដែលវាចេញមកតែប៉ុណ្ណោះ ប៉ុន្តែមេជីវិតឈ្មោល មានអាយុរបស់វា រហូតដល់ទៅ ១ សប្តាហ៍។ ហេតុនេះ ឱកាស ៦ ថ្ងៃនៃការមានផ្ទៃពោះរបស់ស្រ្តី គឺខ្ពស់។

អ្នកអាចធ្វើការរួមភេទ នៅមុនពេល ថ្ងៃបញ្ចេញអូវុល ១ ឬ ២ ថ្ងៃ។ ប៉ុន្តែប្រសិនជាអាច អ្នកគួរតែធ្វើការរួមភេទរៀងរាល់ ២ ទៅ៣ថ្ងៃម្តង ទើបជាការប្រសើរ។ ប្រសិនបើអ្នក ចង់ឲ្យកាន់តែច្បាស់ អ្នកត្រូវតែដឹងថា អ្នកបញ្ចេញអូវុល ឬស៊ុតបង្កកំណើតនៅពេលណា។ ការបញ្ចេញស៊ុតអូវុល អាស្រ័យទៅលើកត្តាពីរគឺ ៖

• រយៈពេល នៃវដ្តរដូវ

• និងភាពទៀងទាត់ នៃរដ្តរដូវ។

រយៈពេលនៃវដ្តរដូវ អាចខ្លីត្រឹម ២២ ថ្ងៃមករដូវម្តង ឬរយៈពេលវែង រហូត ៣៦ ថ្ងៃទើបមករដូវម្តង។ ជាធម្មតា ស្រ្តីនឹងមករដូវ ក្រោយពីបញ្ចេញអូវុលបាន ១២ ទៅ ១៤ ថ្ងៃ។ ប្រសិនបើអ្នកមានរយៈពេលនៃវដ្តរដូវ ២៨ ថ្ងៃ អ្នកនឹងបញ្ចេញអូវុល នៅអំឡុងថ្ងៃទី ១៤។ ប្រសិនបើរយៈពេលនៃវដ្តរដូវរបស់អ្នកខ្លី អ្នកអាចបញ្ចេញអូវុល នៅថ្ងៃបន្ទាប់ ក្រោយពីមករដូវអស់។ ប្រសិនបើអ្នកមានរយៈពេលនៃវដ្តរដូវវែង អ្នកនឹងបញ្ចេញអូវុល នៅអំឡុង ២ សប្តាហ៍ក្រោយពីមករដូវអស់។

ផ្ទុយទៅវិញ មនុស្សស្រីជាងពាក់កណ្តាលរបស់ពិភពលោក មានថ្ងៃមករដូវខុសៗគ្នា រហូតច្រើនជាង ៧ ថ្ងៃក៏មាន។ ហេតុនេះ ប្រសិនបើអ្នកមានរយៈពេល នៃវដ្តរដូវខុសៗគ្នា ពីមួយខែ ទៅមួយខែ ថ្ងៃបញ្ចេញអូវុល ក៏មានភាពខុសគ្នាទៅតាមសប្តាហ៍របស់វាដែរ។

ហេតុនេះហើយបានជា ការរួមភេទរាល់ ២ ទៅ ៣ ម្តង នៅអំឡុងមួយវដ្តរដូវ (ខែដែលអ្នក និងដៃគូចង់បានបុត្រ) ជាវិធីមានប្រសិទ្ធភាពបំផុត។ វាល្អជាងអ្នក ចំណាយកម្លាំង និងខួរក្បាលផ្តោតលើការរាប់ថ្ងៃបញ្ចេញអូវុលយ៉ាងលំបាក។ ជាងនេះទៅទៀត ការរួមភេទរៀងរាល់ ២ ទៅ ៣ ថ្ងៃម្តង អាចជួយបង្កើនគុណភាពមេជីវិតឈ្មោលបានល្អជាង ការរួមភេទជារៀងរាល់ថ្ងៃ។

# តើស្រ្តីអាចដឹងថា ខ្លួននឹងត្រូវបញ្ចេញអូវុល ដោយការសង្កេត បានដែរឬទេ?

ជាក់ស្តែង ស្រ្តីអាចដឹងពីពេល ដែលស្បូនបញ្ចេញអូវុលបាន បើមិនដូច្នោះទេ ក៏អាចសម្គាល់ឃើញពីភាពខុសប្លែកមួយចំនួនបានដែរ។ សញ្ញាណមួយចំនួន ដែលប្រាប់អ្នកថាអូវុល ត្រូវបានបញ្ចេញ កើតឡើង នៅបន្ទាប់ពីពេលអ្នកអស់រដូវ ឬនៅអំឡុង ៣ សប្តាហ៍ មុនពេលការមករដូវខែបន្ទាប់។ អ្នកគួរព្យាយាមសង្កេតមើលរោគសញ្ញាដូចខាងក្រោម ៖ 

• ទ្វារមាស មានហូរទឹករំអិលច្រើនខុសពីធម្មតា (មានសភាពដូចជាស៊ុតស ដែលគេហៅវាថាជា Fertile mucus)

• មានអារម្មណ៍ថា មិនសូវស្រួលត្រង់ចំហៀងពោះ (mittelschmerz)

• មានចំណង់ផ្លូវភេទ ។

អ្នកដែលមានបញ្ហាវដ្តរដូវមិនទៀងទាត់ខ្លាំង មានការលំបាក ក្នុងការប៉ាន់ប្រមាណថ្ងៃបញ្ចេញអូវុល ឬស៊ុតបង្កកំណើតបន្តិចហើយ។ ហេតុនេះ មានតែការត្រួតពិនិត្យមើលទឹករំអិលតាមទ្វារមាស ជាប្រចាំ និងធ្វើការរួមភេទ ក្នុងអំឡុងពេលមានទឹករំអិលនោះទេ ទើបជាជម្រើសល្អ។ ឬក៏ដូចតាមដែលលើកឡើងខាងលើរួចមកហើយគឺ រួមភេទរាល់ ២ ទៅ ៣ ថ្ងៃម្តង នៅអំឡុងមួយវដ្តរដូវ (ខែដែលអ្នក និងដៃគូចង់បានបុត្រ)។

# វិធីសាស្រ្ត ក្នុងការកំណត់ភេទ របស់ទារកក្នុងផ្ទៃ

១. ប្រសិនបើអ្នកចង់បានកូនប្រុស អ្នកត្រូវ...

• ទទួលទានអាហារ ដែលសំបូរទៅដោយប៉ូតាស្យូម រួមមានដូចជា ចេក ទឹកដូង ផ្លែប៉ោម ដំឡូងបារាំង ប៉េងប៉ោះ ត្រីសាល់ម៉ុង ផ្លែប៊ឺរ ប្រូខូលី ផ្សិត និងសាច់សុទ្ធ។

• ទទួលទានអាហារ ដែលមានជាតិប្រៃដូចជា ដំឡូងចំណិត អូលីវ និងពោតលីង។

• ចៀសវាងផលិតផលទឹកដោះគោ ដូចជាឈីស យ៉ាអួ សូកូឡា -ល-។

• ទទួលទានជាតិកាហ្វេអ៊ីនបន្តិចបន្តួច ជារៀងរាល់ថ្ងៃ (***មិនត្រូវទទួលទានច្រើនលើសលុបឡើយ***)

• ឲ្យស្វាមីរបស់អ្នក ទទួលទានជាតិកាហ្វេអ៊ីន មុនរួមភេទឲ្យបាន ១៥ ទៅ ៣០ នាទី ដើម្បីឲ្យមេជីវិតឈ្មោល អាចមានល្បឿនលឿនជាងមុន

• ឲ្យស្វាមីស្លៀកប្រភេទខោខ្លី (boxer) និងចៀសវាងការកកិតខ្លាំង ដូចជាជិះកង់ជាដើម

• រួមភេទ ឲ្យចំថ្ងៃបញ្ចេញអូវុល (ស៊ុតបង្កកំណើត)

• រួមភេទ នៅពេលយប់

• ប្រើក្បាច់រួមភេទ ដោយឲ្យខាងប្រុសវាយលុកពីខាងក្រោយ (ក្បាច់សុនខ ឬក្បាច់ឈរ)

២. ប្រសិនបើអ្នកចង់បានកូនស្រី អ្នកត្រូវ...

• ទទួលទានអាហារដែលមានជាតិផ្អែម ជាតិកាល់ស្យូម និងជាតិម៉ាញ៉េស្យូមខ្ពស់ ដូចជាទឹកដោះគោ ទឹករ៉ែ យ៉ាអួ ឈីស ស៊ុត គ្រាប់ផ្កាឈូករ័ត្ន គ្រាប់ល្ពៅ ផ្លែក្រូច(ទឹកក្រូច) គ្រាប់អាល់ម៉ុង សាច់មាន់ តៅហ៊ូ សណ្តែក និងសណ្តែកខ្មៅ

• ចៀសវាងអាហារ ដែលសំបូរទៅដោយជាតិប្រៃ និងប៉ូតាស្យូមខ្ពស់

• ចៀសវាងការទទួលទានជាតិកាហ្វេអ៊ីន

• ឲ្យដៃគូខាងបុរស ស្លៀកខោ ឬខោក្នុងឲ្យរាងតឹងបន្តិច

• រួមភេទនៅមុនថ្ងៃបញ្ចេញអូវុល ឲ្យបាន ២ ទៅ ៣ ថ្ងៃ

• រួមភេទ នៅពេលថ្ងៃ

• ប្រើក្បាច់រួមភេទ ដោយឲ្យខាងប្រុសនៅពីលើខាងស្រី៕